ایران کا اہم دورہ مکمل: فیلڈ مارشل سید عاصم منیر اور محسن نقوی کی ایرانی قیادت سے خطے میں امن پر اہم ملاقاتیں

فوٹو:آئی ایس پی آر

اسلام آباد: فیلڈ مارشل سید عاصم منیر، نشانِ امتیاز (ملٹری)، ہلالِ جرات، چیف آف آرمی اسٹاف و چیف آف ڈیفنس اسٹاف، اور وفاقی وزیر داخلہ محسن نقوی نے وفد کے ہمراہ اسلامی جمہوریہ ایران کا تین روزہ سرکاری دورہ مکمل کر لیا۔

دورے کے دوران فیلڈ مارشل سید عاصم منیر نے ایران کے صدر ڈاکٹر مسعود پزشکیان سے ملاقات کی۔ اس کے علاوہ انہوں نے ایرانی قومی اسمبلی کے اسپیکر محمد باقر قالیباف، وزیر خارجہ عباس عراقچی اور خاتم الانبیاء ہیڈکوارٹرز کے کمانڈر میجر جنرل علی عبداللہی سے بھی علیحدہ علیحدہ ملاقاتیں کیں۔

ملاقاتوں کے دوران خطے میں پائیدار امن کے قیام، بدلتی ہوئی علاقائی سکیورٹی صورتحال، جاری سفارتی کوششوں اور امن و استحکام کے فروغ کے لیے مشترکہ اقدامات پر تفصیلی تبادلہ خیال کیا گیا۔ فیلڈ مارشل سید عاصم منیر نے خطے میں کشیدگی کے خاتمے، مذاکرات کے فروغ اور بقایا مسائل کے پرامن حل کے لیے مسلسل سفارتی رابطوں کی اہمیت پر زور دیا۔

فیلڈ مارشل نے ایرانی قیادت اور عوام کی جانب سے پرتپاک میزبانی پر دلی شکریہ ادا کیا۔ انہوں نے پاکستان کے صدر، وزیراعظم اور عوام کی جانب سے ایرانی قیادت کے لیے نیک تمناؤں اور خیر سگالی کے جذبات کا اظہار کیا اور دونوں ممالک کے درمیان تاریخی، مذہبی اور برادرانہ تعلقات کو مزید مضبوط بنانے کے عزم کا اعادہ کیا۔

اس موقع پر دونوں ممالک کے درمیان علاقائی استحکام، سرحدی تعاون، سکیورٹی امور اور اقتصادی تعلقات کو مزید وسعت دینے پر بھی اتفاق کیا گیا۔ وفود کی سطح پر ہونے والی ملاقاتوں میں باہمی تعاون کو فروغ دینے اور مشترکہ چیلنجز سے نمٹنے کے لیے مختلف تجاویز پر غور کیا گیا۔

یہ دورہ مشرق وسطیٰ میں جاری کشیدگی کے تناظر میں انتہائی اہم قرار دیا جا رہا ہے۔ اس دورے سے پاکستان کے اس عزم کا اظہار ہوتا ہے کہ وہ خطے میں مذاکرات کے ذریعے مسائل کے حل، امن و استحکام کے قیام اور مشترکہ ترقی و خوشحالی کے فروغ کے لیے فعال کردار ادا کرتا رہے گا۔

پاکستانی وفد کے اس دورے کو دونوں برادر اسلامی ممالک کے درمیان تعلقات کو مزید مضبوط بنانے اور خطے میں امن و استحکام کی کوششوں کے لیے ایک اہم پیش رفت قرار دیا جا رہا ہے۔