کراچی: پاکستان کے معروف سینیئر اسپورٹس صحافی، کرکٹ رائٹر اور تجزیہ کار قمر احمد 88 برس کی عمر میں کراچی میں انتقال کر گئے۔ اہل خانہ کے مطابق وہ کافی عرصے سے دل کے عارضے میں مبتلا تھے۔
قمر احمد کا شمار پاکستان کے ابتدائی اور ممتاز کرکٹ صحافیوں میں ہوتا تھا۔ انہوں نے اپنے طویل صحافتی کیریئر کے دوران دنیا بھر میں 400 سے زائد ٹیسٹ میچز اور 600 سے زیادہ ایک روزہ بین الاقوامی میچز کی کوریج کی، جبکہ متعدد آئی سی سی ایونٹس کی رپورٹنگ بھی انجام دی۔
23 اکتوبر 1937 کو بھارتی ریاست اتر پردیش میں پیدا ہونے والے قمر احمد نے زندگی کا ایک طویل عرصہ انگلینڈ میں بھی گزارا۔ صحافت کے ساتھ ساتھ انہوں نے فرسٹ کلاس کرکٹ بھی کھیلی اور مجموعی طور پر 17 فرسٹ کلاس میچز میں حصہ لیا۔ وہ قائداعظم ٹرافی میں حیدرآباد ٹیم کی قیادت بھی کر چکے تھے۔
قمر احمد کو دنیا کے ممتاز کرکٹ رائٹرز اور تجزیہ کاروں میں شمار کیا جاتا تھا اور ان کی خدمات کو بین الاقوامی سطح پر بھی سراہا گیا۔
اہل خانہ کے مطابق مرحوم کی نماز جنازہ آج بعد نماز مغرب ڈی ایچ اے فیز 4 کراچی کی بیت السلام مسجد میں ادا کی جائے گی۔
تحریر کے بارے میں اپنی رائے بھیجیں