توانائی بچانے کے لیے ملک بھر میں بازار اور شاپنگ مالز رات 8 بجے بند کرنے کا فیصلہ، سندھ مستثنیٰ
اسلام آباد: حکومت نے توانائی کے تحفظ کے اقدامات کے تحت سندھ کے علاوہ ملک بھر میں بازاروں اور شاپنگ مالز کو رات 8 بجے بند کرنے کا فیصلہ کر لیا ہے۔ یہ فیصلہ پیر کے روز وزیراعظم شہباز شریف کی زیر صدارت اسلام آباد میں ہونے والے اہم اجلاس میں کیا گیا۔
وزیراعظم آفس کی جانب سے جاری بیان کے مطابق خیبرپختونخوا کے ڈویژنل ہیڈکوارٹرز میں بازاروں کو رات 9 بجے تک کھلا رکھنے کی اجازت دی گئی ہے، جبکہ سندھ میں کاروباری اوقات کار کے حوالے سے مشاورت جاری ہے۔
بیان کے مطابق خیبرپختونخوا کے دیگر اضلاع، پنجاب، بلوچستان، اسلام آباد، گلگت بلتستان اور آزاد کشمیر میں تمام بازار اور شاپنگ مالز رات 8 بجے بند کر دیے جائیں گے۔ اس کے علاوہ روزمرہ استعمال کی اشیاء فروخت کرنے والی دکانیں اور ڈیپارٹمنٹل اسٹورز بھی اسی وقت بند ہوں گے۔
اجلاس میں مزید فیصلہ کیا گیا کہ بیکریاں، ریسٹورنٹس، تندور اور کھانے پینے کی اشیاء فروخت کرنے والی دکانیں رات 10 بجے تک بند کر دی جائیں گی۔ اسی طرح شادی ہالز، مارکیز اور شادی کی دیگر تقریبات کے لیے استعمال ہونے والی کمرشل جگہوں کو بھی رات 10 بجے بند کرنا ہوگا۔
بیان میں یہ بھی کہا گیا کہ نجی گھروں اور پرائیویٹ پراپرٹیز میں ہونے والی شادی کی تقریبات بھی رات 10 بجے کے بعد منعقد کرنے پر پابندی ہوگی۔ تاہم میڈیکل اسٹورز اور فارمیسیز کو ان پابندیوں سے استثنیٰ دیا گیا ہے۔
حکومت کے مطابق نئے اوقات کار کا اطلاق 7 اپریل (منگل) سے ہوگا۔
یہ فیصلے ایسے وقت میں کیے گئے ہیں جب مشرق وسطیٰ میں جاری جنگ کے باعث عالمی سطح پر ایندھن کی قیمتوں میں اضافہ اور سپلائی میں خلل پیدا ہوا ہے۔ 28 فروری کو امریکا اور اسرائیل کی جانب سے ایران پر حملوں کے بعد آبنائے ہرمز میں جہاز رانی متاثر ہوئی، جس کے نتیجے میں عالمی منڈی میں تیل کی قیمتیں بڑھ گئیں۔
وزیراعظم آفس کے مطابق اجلاس میں ایندھن اور توانائی کی بچت سے متعلق اقدامات کے ساتھ ساتھ کفایت شعاری پالیسیوں کا بھی جائزہ لیا گیا۔ حکومت نے ایندھن کے بحران سے نمٹنے کے لیے ڈیجیٹل والیٹ سبسڈی سمیت متعدد اقدامات کیے ہیں، جن کے تحت 100,000 روپے تک کی ٹرانزیکشن کی گئی ہے اور پیٹرولیم مصنوعات پر ریلیف فراہم کیا جا رہا ہے۔
وزیراعظم نے پنجاب، خیبرپختونخوا، بلوچستان، گلگت بلتستان اور آزاد کشمیر کی حکومتوں کا اتفاق رائے سے فیصلے کرنے پر شکریہ ادا کیا اور امید ظاہر کی کہ سندھ حکومت بھی مشاورت کے بعد توانائی بچانے کے اقدامات میں شامل ہو جائے گی۔
وزیراعظم نے یہ بھی اعلان کیا کہ گلگت اور مظفرآباد میں ایک ماہ کے لیے بین الاضلاعی پبلک ٹرانسپورٹ مفت فراہم کی جائے گی اور اس کے تمام اخراجات وفاقی حکومت برداشت کرے گی۔
اجلاس میں نائب وزیراعظم اور وزیر خارجہ اسحاق ڈار، وزیر اقتصادی امور احد چیمہ سمیت دیگر اعلیٰ حکام نے شرکت کی۔
سندھ میں کاروباری اوقات کار پر مشاورت جاری
دوسری جانب وزیراعلیٰ سندھ مراد علی شاہ نے کاروباری برادری کے نمائندوں سے ملاقات کی۔ اجلاس میں کراچی چیمبر آف کامرس اینڈ انڈسٹری، کورنگی ایسوسی ایشن آف ٹریڈ اینڈ انڈسٹری سمیت مختلف کاروباری تنظیموں کے نمائندے شریک ہوئے۔
وزیراعلیٰ سندھ نے کہا کہ ملک کی موجودہ صورتحال میں توانائی بچانے کے لیے سب کو اپنا کردار ادا کرنا ہوگا۔ انہوں نے یقین دہانی کرائی کہ مارکیٹوں کے اوقات کار کاروباری برادری سے مشاورت کے بعد طے کیے جائیں گے تاکہ عوام پر کم سے کم بوجھ پڑے۔
انہوں نے مزید کہا کہ تاجروں کی جانب سے دی گئی تجاویز کا جائزہ لینے کے بعد وزیراعظم کو آگاہ کیا جائے گا، جس کے بعد سندھ میں کاروباری اوقات کار سے متعلق حتمی فیصلہ کیا جائے گا۔
اسلام آباد: 6 اپریل 2026
— Prime Minister's Office (@PakPMO) April 6, 2026
وزیراعظم محمد شہباز شریف نے پیٹرولیم مصنوعات ، توانائی کی بچت اور کفایت شعاری کے اقدامات کے نفاذ کے حوالےسے اہم جائزہ اجلاس کی صدارت کی. صوبہء پنجاب، خیبر پختونخوا، بلوچستان ، اسلام آباد کیپیٹل ٹیریٹری ، گلگت بلتستان اور آزاد جموں و کشمیر میں بازار،… pic.twitter.com/BEsPreuQWa
تحریر کے بارے میں اپنی رائے بھیجیں