 |
| (فائل فوٹو) حکام کے مطابق رواں سال پاکستان سے تقریباً 179,210 افراد فریضہ حج ادا کرنے کی سعادت حاصل کریں گے |
پاکستانی عازمینِ حج کے قافلے مکہ مکرمہ پہنچنا شروع، حج آپریشن اگلے مرحلے میں داخل ہو گئے ۔
پاکستان سے تعلق رکھنے والے عازمینِ حج کے ابتدائی قافلے مکہ مکرمہ پہنچنا شروع ہو گئے ہیں۔ اس بات کی تصدیق وزارتِ مذہبی امور کی جانب سے پیر کے روز کی گئی ہے۔
وزارت کے مطابق پاکستانی عازمینِ حج نے پہلے مرحلے میں مدینہ منورہ میں اپنا قیام مکمل کر لیا ہے، جس کے بعد اب حج آپریشن کا دوسرا مرحلہ شروع ہو چکا ہے۔ اس مرحلے کے تحت شیڈول کے مطابق عازمین کو مدینہ منورہ سے مکہ مکرمہ منتقل کیا جا رہا ہے۔
پیر کے روز مجموعی طور پر 651 پاکستانی عازمینِ حج مکہ مکرمہ پہنچے۔ حکام کے مطابق رواں سال پاکستان سے تقریباً 179,210 افراد فریضہ حج ادا کرنے کی سعادت حاصل کریں گے۔
حج سیزن کے تحت پاکستانی عازمین کی حجازِ مقدس روانگی کا سلسلہ 18 اپریل سے جاری ہے اور اب تک ہزاروں عازمین سعودی عرب پہنچ چکے ہیں۔
رواں سال سعودی حکومت کی جانب سے حج انتظامات میں ایک اہم تبدیلی یہ کی گئی ہے کہ عازمین کو پہلے ہی آگاہ کر دیا گیا ہے کہ وہ منیٰ میں کس کیمپ میں قیام کریں گے۔ اس مقصد کے لیے منیٰ کے تمام رہائشی کیمپوں کے نمبر پہلے سے جاری کر دیے گئے ہیں۔
مزید برآں سعودی حج حکام نے اس سال ڈیجیٹل نظام کو بھی مزید بہتر بنایا ہے تاکہ عازمینِ حج کو سہولت، آسانی اور بہتر انتظامات فراہم کیے جا سکیں۔
تحریر کے بارے میں اپنی رائے بھیجیں