راولپنڈی اسلام آباد میں ٹرانسپورٹ کے حوالے سے اہم فیصلہ،اچھی خبر

ڈپٹی کمشنر اسلام آباد کے مطابق اب تمام پبلک ٹرانسپورٹ اور مال بردار گاڑیوں کو شہر میں داخلے کی اجازت ہوگی۔

اسلام آباد اور راولپنڈی میں ٹرانسپورٹ کے حوالے سے اہم فیصلہ، تمام بس اڈے کھول دیے گئے

اسلام آباد کی ضلعی انتظامیہ نے ایک ہفتے سے بند تمام قسم کی پبلک اور گڈز ٹرانسپورٹ کو شہر میں داخلے کی اجازت دے دی ہے۔

ضلعی انتظامیہ کے مطابق اسلام آباد میں فیض آباد کے علاوہ تمام بس اڈے کھول دیے گئے ہیں، جبکہ فیض آباد بس ٹرمینل تاحکم ثانی بند رہے گا۔

ایران اور امریکا کے درمیان ممکنہ جنگ بندی مذاکرات کے پیش نظر گزشتہ ایک ہفتے سے بند ٹرانسپورٹ سروسز بحال کی گئی ہیں۔

حکام کا کہنا ہے کہ پیرودھائی سمیت دیگر ٹرانسپورٹ اڈے پیر کی صبح سے کھول دیے جائیں گے۔

ذرائع کے مطابق مذاکرات کے سلسلے میں مرکزی وفود کی آمد سے قبل پاکستان میں موجود امریکا کی ایڈوانس ٹیم واپس روانہ ہو رہی ہے، جبکہ اس سے پہلے بھی امریکی ایڈوانس ٹیم ایرانی وفد کی روانگی کے بعد واپس جا چکی ہے۔

سیکیورٹی ذرائع کے مطابق ایڈوانس سیکیورٹی ٹیم کی روانگی کے وقت راولپنڈی اور اسلام آباد میں سخت حفاظتی انتظامات کیے گئے تھے۔

اسلام آباد انتظامیہ نے راولپنڈی سے میٹرو بس سروس بحال کرنے کا بھی اعلان کیا ہے، اور بتایا ہے کہ اتوار سے سروس مکمل طور پر بحال ہو جائے گی۔ حکومت پنجاب کی الیکٹرک بس سروس بھی اسی روز سے دوبارہ شروع ہوگی۔

ٹرانسپورٹ حکام کے مطابق تمام روٹس پر چلنے والی ای وی ٹرانسپورٹ بھی اتوار سے آپریشنل ہوگی، جو راولپنڈی صدر اسٹیشن سے اسلام آباد شہید ملت اسٹیشن تک چلے گی، تاہم پریڈ گراونڈ اور سیکریٹریٹ اسٹیشن تاحکم ثانی بند رہیں گے۔