این ڈی ایم اے کا الرٹ، ملک کے مختلف علاقوں میں آندھی، تیز ہواؤں اور گرج چمک کے ساتھ بارش کی پیشگوئی

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر نے آئندہ 12 سے 24 گھنٹوں کے دوران ملک کے مختلف علاقوں میں تیز ہواؤں، آندھی، گرج چمک اور بارشوں کے حوالے سے الرٹ جاری کرتے ہوئے متعلقہ اداروں کو پیشگی اقدامات کی ہدایت کر دی ہے۔

این ڈی ایم اے کے مطابق موجودہ موسمی صورتحال پہلے سے جاری موسمی جائزوں کے مطابق ہے اور کسی بھی ہنگامی صورتحال سے مؤثر انداز میں نمٹنے کے لیے تمام متعلقہ اداروں کو الرٹ کر دیا گیا ہے۔

ادارے کے مطابق پنجاب کے مختلف علاقوں جن میں اسلام آباد، راولپنڈی، مری، اٹک، چکوال، تلہ گنگ، گجرات، جہلم، سیالکوٹ، گوجرانوالہ، لاہور، فیصل آباد، خوشاب، جھنگ، میانوالی، ڈیرہ غازی خان، قصور، اوکاڑہ، ساہیوال، ملتان، بہاولپور اور رحیم یار خان شامل ہیں، گرج چمک کے ساتھ بارش اور تیز ہواؤں کا امکان ہے۔

خیبرپختونخوا کے چترال، دیر، سوات، بٹگرام، مانسہرہ، ایبٹ آباد، ہری پور، مردان، چارسدہ، پشاور، کوہاٹ، کرک، بنوں، ڈیرہ اسماعیل خان اور وزیرستان میں بھی بارش اور آندھی کی پیشگوئی کی گئی ہے۔

این ڈی ایم اے نے گلگت بلتستان، آزاد کشمیر اور خیبرپختونخوا کے پہاڑی علاقوں کے لیے خصوصی الرٹ جاری کرتے ہوئے خبردار کیا ہے کہ گلیشیئر جھیلوں کے پھٹنے، اچانک سیلاب، لینڈ سلائیڈنگ اور ملبے کے ریلوں کا خطرہ موجود ہے، جس سے مقامی آبادی اور سیاح متاثر ہو سکتے ہیں۔

بلوچستان کے تربت، کیچ، آواران، خضدار اور ژوب جبکہ سندھ کے جیکب آباد، سکھر، لاڑکانہ، خیرپور، دادو، گھوٹکی، کشمور، شکارپور، شہید بینظیر آباد اور کراچی کے بعض علاقوں میں بھی تیز ہواؤں اور گرج چمک کے ساتھ بارش متوقع ہے۔

این ڈی ایم اے نے ضلعی انتظامیہ، ریسکیو اداروں اور دیگر متعلقہ محکموں کو حساس علاقوں کی مسلسل نگرانی اور ہنگامی صورتحال سے نمٹنے کے لیے مکمل تیاری رکھنے کی ہدایت کی ہے۔

ادارے نے شہریوں، خصوصاً سیاحوں اور مسافروں کو غیر ضروری سفر سے گریز کرنے اور روانگی سے قبل موسم کی تازہ صورتحال سے آگاہی حاصل کرنے کا مشورہ دیا ہے تاکہ کسی بھی ممکنہ خطرے سے محفوظ رہا جا سکے۔