پاکستان میں عیدالاضحیٰ کب ہونے کا امکان؟ رویت ہلال ریسرچ کونسل نے ممکنہ تاریخ بتا دی

فوٹو: فائل

اسلام آباد: رویت ہلال ریسرچ کونسل نے سائنسی بنیادوں پر پیشگوئی کرتے ہوئے کہا ہے کہ پاکستان میں عیدالاضحیٰ 27 مئی بروز بدھ کو ہونے کا قوی امکان ہے۔

رویت ہلال ریسرچ کونسل کے سیکرٹری جنرل خالد اعجاز مفتی کے مطابق فلکیاتی اور سائنسی اعداد و شمار کے جائزے سے ظاہر ہوتا ہے کہ ملک میں ذوالحجہ کا چاند 17 مئی کی شام باآسانی نظر آنے کے امکانات موجود ہیں، جس کے نتیجے میں عیدالاضحیٰ 27 مئی کو منائی جا سکتی ہے۔

انہوں نے بتایا کہ نئے چاند کی پیدائش 16 اور 17 مئی کی درمیانی شب پاکستانی وقت کے مطابق رات ایک بج کر 15 منٹ پر ہوگی۔ اس کے بعد 17 مئی کی شام غروبِ آفتاب کے وقت چاند کی عمر پاکستان کے بیشتر علاقوں میں 18 گھنٹے سے زائد ہو جائے گی، جو رویت ہلال کے لیے موزوں سمجھی جاتی ہے۔

خالد اعجاز مفتی کا کہنا تھا کہ اگر 17 مئی کی شام ملک کے مختلف حصوں میں مطلع ابر آلود رہا اور چاند نظر نہ آ سکا تو ذی القعدہ کے 30 دن مکمل کیے جائیں گے، جس کے بعد یکم ذی الحجہ 19 مئی بروز منگل کو ہوگی۔

انہوں نے مزید کہا کہ موجودہ سائنسی اندازوں کے مطابق اس بار پاکستان اور سعودی عرب میں عیدالاضحیٰ ایک ہی دن یعنی 27 مئی کو منائے جانے کا امکان ہے، تاہم حتمی اعلان مرکزی رویت ہلال کمیٹی چاند نظر آنے کی شہادتوں کی بنیاد پر کرے گی۔