پی ایس ایل فائنل: وزیرِاعظم شہباز شریف کی قذافی اسٹیڈیم آمد، کھلاڑیوں سے ملاقات اور شائقین کا جوش عروج پر

سکرین شاٹ

پی ایس ایل فائنل: وزیرِاعظم شہباز شریف کی قذافی اسٹیڈیم آمد، کھلاڑیوں سے ملاقات اور شائقین کا جوش عروج پر

لاہور: وزیرِاعظم شہباز شریف پاکستان سپر لیگ کے سیزن 11 کے فائنل میچ کے موقع پر قذافی اسٹیڈیم پہنچے، جہاں ان کا شاندار استقبال کیا گیا۔ اس موقع پر محسن نقوی نے وزیرِاعظم کا پرتپاک خیرمقدم کیا۔

وزیرِاعظم نے اسٹیڈیم آمد کے دوران فائنل میں شریک ٹیموں پشاور زلمی اور حیدرآباد کنگز مین کے کھلاڑیوں سے ملاقات کی، ان سے مصافحہ کیا اور ان کی کارکردگی کے لیے نیک خواہشات کا اظہار کیا۔ انہوں نے میچ کا کچھ حصہ بھی دیکھا اور کھلاڑیوں کے کھیل کو سراہتے ہوئے لیگ کے معیار کو مثبت قرار دیا۔

دورانِ تقریب وزیرِاعظم نے پاکستان سپر لیگ کی ٹرافی کے ساتھ تصاویر بھی بنوائیں، جو شائقینِ کرکٹ کے لیے توجہ کا مرکز بنیں۔ اس موقع پر وفاقی کابینہ کے اہم اراکین بھی ان کے ہمراہ موجود تھے، جن میں محمد اورنگزیب، اعظم نزیر تارڑ، عطاء اللہ تارڑ، شزہ فاطمہ خواجہ، عبد العلیم خان، رانا مبشر اقبال اور معاونِ خصوصی طلحہ برکی شامل تھے۔

فائنل میچ کے دوران اسٹیڈیم میں شائقینِ کرکٹ کی بڑی تعداد موجود رہی، جنہوں نے اپنی پسندیدہ ٹیموں کی بھرپور حوصلہ افزائی کی۔ پورا ماحول جوش و خروش سے بھرپور رہا اور ہر چوکے اور چھکے پر تماشائیوں کا ردعمل دیدنی تھا۔

وزیرِاعظم شہباز شریف میچ کا کچھ حصہ دیکھنے کے بعد اسٹیڈیم سے روانہ ہوگئے، تاہم ان کی آمد نے ایونٹ کی رونق کو مزید بڑھا دیا اور کھلاڑیوں سمیت شائقین کے حوصلے بلند کیے۔