ایران کی دو پاکستانی جہازوں کو ہرمز سے گزرنے کی اجازت، تیل سپلائی بہتر ہونے کی امید

شپنگ ذرائع کے مطابق پاکستان نیشنل شپنگ کارپوریشن (پی این ایس سی) کا جہاز ملتان اور چارٹر جہاز پی الیکی آبنائے ہرمز سے بحفاظت باہر نکل آئے ہیں۔ ذرائع کا کہنا ہے کہ دونوں جہاز 31 مارچ کو پاکستان پہنچنے کا امکان ہے۔

شپنگ ذرائع کے مطابق چارٹر جہاز پی الیکی میں تقریباً ساڑھے 8 کروڑ لیٹر خام تیل لدا ہوا ہے، جو ملکی ضروریات کو پورا کرنے میں اہم کردار ادا کرے گا۔

ذرائع نے مزید بتایا کہ دونوں جہاز گزشتہ ایک ماہ سے خلیج فارس میں کشیدگی اور سیکیورٹی خدشات کے باعث پھنسے ہوئے تھے۔ تاہم دونوں جہازوں نے گزشتہ روز خلیجی ممالک کے قریب سے آبنائے ہرمز کا سفر شروع کیا اور بحفاظت گزرنے میں کامیاب رہے۔

خیال رہے کہ اس سے قبل بھی پاکستانی جہاز آبنائے ہرمز سے ایران کی خصوصی اجازت کے بعد گزر چکے ہیں، تاہم حالیہ علاقائی کشیدگی کے باعث اس راستے کو مزید حساس قرار دیا جا رہا ہے۔

ماہرین کے مطابق دونوں جہازوں کی پاکستان آمد سے ملک میں تیل کی سپلائی بہتر ہونے کی توقع ہے جبکہ توانائی کے بحران کے خدشات میں بھی کمی آئے گی۔