پیٹرول پمپ مالکان کی ہڑتال کی دھمکی، مطالبات نہ مانے گئے تو ملک بھر میں فیول بحران کا خدشہ

آل پاکستان پیٹرول پمپ اونرز ایسوسی ایشن نے اپنے خدشات دور نہ ہونے کی صورت میں ملک بھر کے ہزاروں پیٹرول پمپس بند کرنے کی دھمکی دے دی ہے۔

ایسوسی ایشن کی جانب سے جاری اعلامیے کے مطابق وزیرِ پیٹرولیم علی پرویز ملک سے فوری ملاقات کے لیے مراسلہ ارسال کر دیا گیا ہے۔ اعلامیے میں کہا گیا ہے کہ 6 مارچ کو بھی ملاقات کے لیے خط لکھا گیا تھا تاہم تاحال کوئی جواب موصول نہیں ہوا۔

مراسلے میں کہا گیا ہے کہ پیٹرولیم سیکٹر کو اس وقت آپریشنل مسائل، مالی مشکلات، قیمتوں کے عدم استحکام اور اچانک پالیسی تبدیلیوں جیسے سنگین چیلنجز کا سامنا ہے۔ ایسوسی ایشن نے مطالبہ کیا ہے کہ حکومت پالیسی سازی کے عمل میں صنعت سے وابستہ اسٹیک ہولڈرز کو شامل کرے۔

اعلامیے کے مطابق ملک بھر میں 14 سے 15 ہزار پیٹرول پمپ مالکان مختلف مسائل کا شکار ہیں جنہیں فوری توجہ کی ضرورت ہے۔ ایسوسی ایشن نے خبردار کیا ہے کہ اگر مطالبات منظور نہ کیے گئے تو ملک بھر میں پیٹرول پمپس بند کرنے پر مجبور ہوں گے۔

ایسوسی ایشن نے مزید کہا کہ پیٹرول پمپس کی بندش کی صورت میں ملک میں شدید فیول بحران پیدا ہو سکتا ہے، جس کی تمام تر ذمہ داری وزارتِ پیٹرولیم پر عائد ہوگی۔