ملک بھر میں 30 مارچ تک بارشوں اور تیز ہواؤں کی پیشگوئی، فلیش فلڈنگ کا خدشہ
محکمہ موسمیات نے آج سے 30 مارچ تک ملک کے مختلف علاقوں میں تیز ہواؤں کے ساتھ بارشوں کی پیشگوئی کرتے ہوئے الرٹ جاری کر دیا ہے، جس کے باعث بعض علاقوں میں فلیش فلڈنگ کا خدشہ ظاہر کیا گیا ہے۔
محکمہ موسمیات کے مطابق مغربی ہواؤں کا نیا سلسلہ ملک میں داخل ہو چکا ہے، جس کے زیر اثر بلوچستان، خیبر پختونخوا، پنجاب، سندھ، اسلام آباد، گلگت بلتستان اور آزاد کشمیر کے مختلف شہروں میں بارش اور تیز ہوائیں متوقع ہیں۔
ادھر بلوچستان کے شہر نوشکی اور گرد و نواح میں موسلا دھار بارش کے باعث ندی نالوں میں طغیانی آ گئی، جس سے نشیبی علاقوں میں پانی جمع ہونے کی اطلاعات موصول ہوئی ہیں۔
محکمہ موسمیات کے مطابق کراچی میں بھی آج، کل، 28 اور 29 مارچ کو بارش کا امکان ہے جبکہ بعض علاقوں میں ژالہ باری بھی ہو سکتی ہے۔ تیز ہواؤں کے باعث شہریوں کو احتیاطی تدابیر اختیار کرنے کی ہدایت کی گئی ہے۔
دوسری جانب چیف سیکرٹری سندھ نے متوقع بارشوں کے پیش نظر تمام متعلقہ اداروں کو ہائی الرٹ رہنے کا حکم دیا ہے۔ کراچی کے کمشنرز، ڈپٹی کمشنرز اور اسسٹنٹ کمشنرز کو آئندہ سات روز تک فیلڈ میں موجود رہنے کی ہدایت جاری کر دی گئی ہے تاکہ کسی بھی ہنگامی صورتحال سے فوری نمٹا جا سکے۔
محکمہ موسمیات نے شہریوں کو غیر ضروری سفر سے گریز کرنے اور نشیبی علاقوں میں احتیاط برتنے کی ہدایت بھی جاری کی ہے۔
.jpg)
تحریر کے بارے میں اپنی رائے بھیجیں