پاکستان میں رمضان المبارک کا چاند نظر آگیا، کل پہلا روزہ ہوگا

پاکستان میں رمضان المبارک 1447 ہجری کا چاند نظر آنے کا باقاعدہ اعلان کر دیا گیا ہے، جس کے بعد ملک بھر میں کل پہلا روزہ رکھا جائے گا

مرکزی رویت ہلال کمیٹی کا اجلاس چیئرمین مولانا عبدالخبیر آزاد کی صدارت میں منعقد ہوا، جس میں مختلف علاقوں سے موصول ہونے والی شہادتوں کا جائزہ لیا گیا۔ اجلاس میں سپارکو اور محکمہ موسمیات کے نمائندوں نے بھی تکنیکی بریفنگ دی۔

مرکزی کمیٹی کے مطابق ملک کے مختلف شہروں سے چاند نظر آنے کی قابلِ اعتماد شہادتیں موصول ہوئیں، جن کی تصدیق کے بعد رمضان المبارک کے آغاز کا باضابطہ اعلان کیا گیا۔

پشاور، اپر دیر اور مہمند سمیت مختلف علاقوں سے رویت کی اطلاعات موصول ہوئیں، جبکہ دیگر صوبائی دارالحکومتوں میں قائم زونل کمیٹیوں نے بھی اپنی رپورٹس مرکزی کمیٹی کو ارسال کیں۔

اعلان کے بعد ملک بھر میں مساجد میں تراویح کا اہتمام کیا جائے گا اور  تمام مسلمان عبادات، روزوں اور خصوصی نوافل کے ذریعے بابرکت مہینے کا آغاز کریں گے۔

واضح رہے کہ محکمہ موسمیات اور سائنسی اداروں کی جانب سے پہلے ہی چاند نظر آنے کے امکانات ظاہر کیے گئے تھے، تاہم حتمی اعلان مرکزی رویت ہلال کمیٹی نے کیا۔

دوسری جانب بنگلادیش اور بھارت میں بھی رمضان المبارک کا چاند نظر آگیا ہے، اور وہاں 19 فروری کو پہلا روزہ رکھا جائے گا۔