 |
| فوٹو: بشکریہ ریڈیو پاکستان |
وزیراعظم محمد شہباز شریف انطالیہ ڈپلومیسی فورم میں شرکت کیلئے ترکیہ پہنچ گئے
ترکیہ کے شہر انطالیہ میں منعقد ہونے والے پانچویں انطالیہ ڈپلومیسی فورم میں شرکت کیلئے وزیراعظم محمد شہباز شریف ترکیہ پہنچ گئے ہیں، جہاں وہ عالمی رہنماؤں کے ساتھ اہم ملاقاتیں بھی کریں گے اور پاکستان کا مؤقف پیش کریں گے۔
وزیراعظم شہباز شریف آج فورم کے لیڈرز پینل میں شرکت کریں گے، جس کے دوران وہ عالمی امور، علاقائی صورتحال اور بین الاقوامی چیلنجز کے حوالے سے پاکستان کا نقطہ نظر پیش کریں گے۔ اس موقع پر مختلف ممالک کے سربراہان مملکت اور عالمی رہنما بھی پینل میں شریک ہوں گے۔
وزیراعظم شہباز شریف انطالیہ ڈپلومیسی فورم کی افتتاحی تقریب میں بھی شرکت کریں گے، جہاں دنیا بھر سے آنے والے رہنماؤں، سفارتکاروں اور پالیسی سازوں کی بڑی تعداد موجود ہوگی۔ فورم کے دوران وزیراعظم کی ترک صدر رجب طیب ایردوان سے ملاقات بھی متوقع ہے، جس میں پاکستان اور ترکیہ کے درمیان دوطرفہ تعلقات، اقتصادی تعاون، دفاعی شراکت داری اور خطے کی مجموعی صورتحال پر تبادلہ خیال کیا جائے گا۔
اس کے علاوہ وزیراعظم شہباز شریف فورم میں شریک دیگر عالمی رہنماؤں سے بھی ملاقاتیں کریں گے، جن میں باہمی دلچسپی کے امور، تجارت، سرمایہ کاری اور علاقائی امن و استحکام سے متعلق معاملات زیر بحث آئیں گے۔
انطالیہ ڈپلومیسی فورم عالمی سطح پر ایک اہم سفارتی پلیٹ فارم سمجھا جاتا ہے، جہاں دنیا بھر کے رہنما، پالیسی ساز، ماہرین اور سفارتکار عالمی مسائل کے حل کیلئے مشترکہ حکمت عملی پر تبادلہ خیال کرتے ہیں۔ وزیراعظم شہباز شریف کی فورم میں شرکت کو پاکستان کی فعال سفارتکاری اور عالمی سطح پر مؤثر کردار کے حوالے سے اہم پیش رفت قرار دیا جا رہا ہے۔
.jpg)
تحریر کے بارے میں اپنی رائے بھیجیں