پاکستان نیوی کا مقامی ساختہ جہاز سے داغے جانے والے اینٹی شپ میزائل کا کامیاب تجربہ

فوٹو:آئی ایس پی آر

پاکستان نیوی کا کامیاب لائیو میزائل فائر، سمندری دفاعی صلاحیت میں اہم پیش رفت

پاکستان نیوی نے سمندر میں اپنی دفاعی صلاحیتوں کا شاندار مظاہرہ کرتے ہوئے مقامی سطح پر تیار کردہ جہاز سے داغے جانے والے اینٹی شپ میزائل کا کامیاب لائیو فائر ٹیسٹ کیا۔ میزائل نے تیز رفتاری اور طویل فاصلے پر اپنے ہدف کو درستگی کے ساتھ نشانہ بنایا۔

یہ تجربہ اعلیٰ تیاری اور درست نشانے کی صلاحیت کا واضح اظہار تھا، جسے چیف آف دی نیول اسٹاف ایڈمرل نوید اشرف، اعلیٰ سائنسدانوں اور انجینئرز نے خود دیکھا۔

نیوی کے مطابق یہ جدید میزائل جدید گائیڈنس سسٹم اور بہتر مینیوورنگ صلاحیتوں سے لیس ہے، جو اسے دشمن کے دفاعی نظام سے بچ کر انتہائی درستگی کے ساتھ ہدف کو نشانہ بنانے کے قابل بناتا ہے۔

پاکستان نیوی کا کہنا ہے کہ اس کامیاب تجربے سے بحری دفاعی صلاحیت، سمندری سلامتی اور خطے میں استحکام برقرار رکھنے کے عزم کو مزید تقویت ملی ہے۔

صدر مملکت، وزیراعظم، چیف آف ڈیفنس فورسز اور سروسز چیفس نے اس کامیابی پر نیول یونٹس اور سائنسدانوں کو خراج تحسین پیش کیا ہے۔