پاکستان اٹامک انرجی کمیشن کی عالمی سطح پر بڑی کامیابی

پاکستان اٹامک انرجی کمیشن اس وقت ملک بھر میں 21 کینسر ہسپتال چلا رہا ہے

پاکستان اٹامک انرجی کمیشن (PAEC) نے عالمی سطح پر ایک اور اہم سنگِ میل عبور کرتے ہوئے لاہور کے انسٹی ٹیوٹ آف نیوکلیئر میڈیسن اینڈ آنکولوجی (انمول) کو انٹرنیشنل اٹامک انرجی ایجنسی (آئی اے ای اے) کا کولیبریٹنگ سینٹر قرار دلوا دیا ہے۔

اس تاریخی کامیابی کے موقع پر انمول میں خصوصی تقریب منعقد ہوئی، جہاں آئی اے ای اے کے کولیبریٹنگ سینٹر کی تختی بھی آویزاں کی گئی۔ تقریب سے خطاب کرتے ہوئے ممبر سائنس ڈاکٹر شکیل عباس روفی نے کہا کہ اس اعزاز کے بعد پاکستان کے مجموعی طور پر پانچ ادارے آئی اے ای اے کے کولیبریٹنگ سینٹر بن چکے ہیں۔

انہوں نے کہا کہ دنیا کے 45 ممالک میں قائم 92 مراکز کی فہرست میں پاکستان کا چوتھا نمبر ہونا ملک کے لیے باعثِ فخر ہے۔

تقریب کے دوران تقریباً ایک ارب 40 کروڑ روپے مالیت کی جدید ٹرو بیم لیناک (TrueBeam LINAC) مشین کا افتتاح بھی کیا گیا، جبکہ نئی کیموتھراپی بے کے قیام سے مریضوں کی گنجائش 20 سے بڑھا کر 50 کر دی گئی ہے۔

ڈائریکٹر انمول ڈاکٹر عامرہ شامی اور ڈی جی ڈاکٹر شازیہ فاطمہ نے اس کامیابی کو ادارے کی تحقیق، جدید ٹیکنالوجی اور طبی معیار میں نمایاں بہتری کا نتیجہ قرار دیا۔

پاکستان اٹامک انرجی کمیشن اس وقت ملک بھر میں 21 کینسر اسپتال چلا رہا ہے، جہاں تقریباً 80 فیصد مریضوں کو جدید علاج کی سہولیات فراہم کی جا رہی ہیں۔