اسلام آباد عالمی سفارت کاری کا مرکز، ایران کا اعلیٰ سطحی وفد امریکا مذاکرات کیلئے پاکستان پہنچ گیا

فوٹو:سکرین شاٹ

اسلام آباد: ایران کا اعلیٰ سطح کا وفد امریکا کے ساتھ اہم مذاکرات میں شرکت کے لیے پاکستان کے دارالحکومت اسلام آباد پہنچ گیا، جس سے خطے میں سفارتی سرگرمیوں میں تیزی آ گئی ہے۔

ترجمان دفتر خارجہ کے مطابق ایرانی وفد کی قیادت ایرانی پارلیمنٹ کے اسپیکر محمد باقر قالیباف کر رہے ہیں، جبکہ ایرانی وزیر خارجہ عباس عراقچی بھی وفد کے ہمراہ اسلام آباد پہنچے۔ ایرانی وفد کی آمد کو امریکا اور ایران کے درمیان ممکنہ پیش رفت کے تناظر میں انتہائی اہم قرار دیا جا رہا ہے۔

اسلام آباد ایئرپورٹ پر ایرانی وفد کا پرتپاک استقبال نائب وزیراعظم و وزیر خارجہ اسحاق ڈار نے کیا۔ اس موقع پر اسپیکر قومی اسمبلی سردار ایاز صادق بھی موجود تھے۔ ذرائع کے مطابق فیلڈ مارشل سید عاصم منیر نے بھی معزز مہمانوں کا خیرمقدم کیا، جبکہ وفاقی وزیر داخلہ محسن نقوی بھی استقبال کرنے والوں میں شامل تھے۔

سفارتی ذرائع کے مطابق ایرانی وفد پاکستان میں قیام کے دوران اہم ملاقاتیں کرے گا جن میں امریکا کے ساتھ ہونے والے مذاکرات کے مختلف پہلوؤں پر مشاورت بھی شامل ہے۔ توقع کی جا رہی ہے کہ ان ملاقاتوں میں خطے کی مجموعی صورتحال، سیکیورٹی امور اور ممکنہ تعاون کے امکانات پر بھی بات چیت ہوگی۔

پاکستان کی جانب سے اس اہم سفارتی عمل میں کردار کو عالمی سطح پر مثبت پیش رفت کے طور پر دیکھا جا رہا ہے۔ حکام کے مطابق پاکستان خطے میں امن، استحکام اور مذاکرات کے فروغ کے لیے فعال کردار ادا کر رہا ہے۔

واضح رہے کہ امریکا اور ایران کے درمیان حالیہ کشیدگی کے بعد مذاکرات کا آغاز ایک اہم سفارتی پیش رفت سمجھا جا رہا ہے، جبکہ اسلام آباد میں ہونے والی یہ ملاقاتیں خطے کے مستقبل پر اثرانداز ہو سکتی ہیں۔

Arrival of the delegation of the Islamic Republic of Iran for Islamabad Talks pic.twitter.com/aJYU9cx5t2

— Ministry of Foreign Affairs - Pakistan (@ForeignOfficePk) April 10, 2026