پنجاب اسمبلی میں وزیراعظم، فیلڈ مارشل اور وزیر خارجہ کو نوبل امن انعام کیلئے نامزد کرنے کی قرارداد جمع
لاہور: پنجاب اسمبلی میں وزیراعظم شہباز شریف، فیلڈ مارشل سید عاصم منیر اور وزیر خارجہ اسحاق ڈار کو نوبل امن انعام کے لیے نامزد کرنے کی قرارداد جمع کرا دی گئی۔
قرارداد مسلم لیگ (ن) کے چیف وہپ رانا محمد ارشد کی جانب سے پنجاب اسمبلی سیکرٹریٹ میں جمع کرائی گئی، جس میں کہا گیا ہے کہ متعلقہ رہنماؤں کی مؤثر سفارت کاری نے خطے میں امن و استحکام کے فروغ میں اہم کردار ادا کیا۔
قرارداد کے متن میں کہا گیا ہے کہ اسرائیل، امریکا اور ایران کے درمیان بڑھتی ہوئی کشیدگی عالمی امن کے لیے سنگین خطرہ بن چکی تھی اور صورتحال کسی بھی وقت بڑے عالمی بحران میں تبدیل ہو سکتی تھی۔ ایسے حساس حالات میں پاکستان کی قیادت نے فعال اور متوازن سفارت کاری کے ذریعے کشیدگی کم کرنے اور جنگ بندی کی راہ ہموار کرنے میں اہم کردار ادا کیا۔
قرارداد میں مزید کہا گیا کہ وزیراعظم، فیلڈ مارشل اور وزیر خارجہ نے بین الاقوامی سطح پر رابطوں کو فروغ دیا اور تنازع کے پرامن حل کے لیے سفارتی کوششیں تیز کیں، جس کے نتیجے میں خطے میں کشیدگی کم ہوئی اور مذاکرات کے امکانات پیدا ہوئے۔
ایوان میں پیش کی گئی قرارداد میں پاکستان کے کردار کو ایک امن پسند ریاست کے طور پر سراہتے ہوئے کہا گیا کہ ملک نے عالمی برادری میں مثبت، متوازن اور تعمیری کردار ادا کیا، جو عالمی امن کے فروغ کے لیے قابلِ تحسین ہے۔
قرارداد میں متفقہ طور پر مطالبہ کیا گیا ہے کہ وزیراعظم شہباز شریف، فیلڈ مارشل سید عاصم منیر اور وزیر خارجہ اسحاق ڈار کو عالمی امن کے قیام میں کردار ادا کرنے پر نوبل امن انعام کے لیے باضابطہ طور پر نامزد کیا جائے۔
تحریر کے بارے میں اپنی رائے بھیجیں