بریانی کے بعد تربوز کھانے سے ایک ہی خاندان کے 4 افراد جاں بحق

بھارت کے شہر ممبئی میں ایک افسوسناک واقعہ پیش آیا جہاں بریانی کھانے کے بعد تربوز کھانے سے ایک ہی خاندان کے چار افراد جان کی بازی ہار گئے۔

NDTV کی رپورٹ کے مطابق فوڈ پوائزننگ کے شبے میں 40 سالہ عبداللہ عبدالقادر، ان کی 35 سالہ اہلیہ نسرین، 16 سالہ بیٹی عائشہ اور 13 سالہ زینب انتقال کر گئے۔

پولیس کے مطابق ہفتے کی شب خاندان نے دیگر رشتہ داروں کے ساتھ بریانی کھائی۔ بعد ازاں رات تقریباً ایک بجے میاں بیوی اور دونوں بچیوں نے تربوز کھایا۔ چند گھنٹوں بعد ہی ان کی طبیعت خراب ہونا شروع ہوگئی۔

صبح تقریباً 5 بجے چاروں افراد کو شدید قے اور دست (ڈائریا) کی شکایت ہوئی۔ ابتدا میں انہیں مقامی ڈاکٹر کے پاس لے جایا گیا جہاں ابتدائی طبی امداد دی گئی، تاہم حالت مزید بگڑنے پر انہیں دوسرے اسپتال منتقل کیا گیا۔

اسپتال میں علاج کرنے والے ڈاکٹر زید قریشی کے مطابق مریضوں کو شدید الٹی اور ڈائریا تھا اور اہل خانہ نے بتایا تھا کہ انہوں نے تربوز کھایا تھا۔ بدقسمتی سے علاج کے دوران چاروں افراد دم توڑ گئے۔

حکام کا کہنا ہے کہ اصل وجہ موت کا تعین پوسٹ مارٹم رپورٹ آنے کے بعد ہی ممکن ہوگا۔ فی الحال فوڈ پوائزننگ کو ابتدائی وجہ قرار دیا جا رہا ہے، تاہم یہ واضح نہیں کہ مسئلہ بریانی سے ہوا یا تربوز سے۔