پرانےاینڈرائیڈ فونز پرجلد واٹس ایپ کی سہولت ختم ہورہی ہے،کہیں آپ کا موبائل بھی فہرست میں تو نہیں؟

پرانے اینڈرائیڈ فونز پر واٹس ایپ سپورٹ ختم، ستمبر 2026 سے لاکھوں صارفین متاثر ہوں گے

اگر آپ 10 یا 11 سال پرانا اینڈرائیڈ فون استعمال کر رہے ہیں تو اب اسے تبدیل کرنے کا وقت آ گیا ہے، کیونکہ میٹا نے اعلان کیا ہے کہ جلد کئی پرانے اینڈرائیڈ فونز پر واٹس ایپ کام کرنا بند کر دے گا۔

رپورٹس کے مطابق ایسے اسمارٹ فونز جو اینڈرائیڈ 5 یا 5.1 پر چل رہے ہیں، ان کے لیے واٹس ایپ کی سپورٹ ختم کی جا رہی ہے۔ کمپنی کا کہنا ہے کہ 8 ستمبر 2026 کے بعد اینڈرائیڈ 6 سے پہلے کے آپریٹنگ سسٹمز پر واٹس ایپ استعمال کرنا ممکن نہیں ہوگا۔

اس فیصلے کے بعد لاکھوں صارفین اپنے پرانے فونز پر واٹس ایپ تک رسائی کھو دیں گے، جبکہ صرف وہی ڈیوائسز واٹس ایپ استعمال کر سکیں گی جو اینڈرائیڈ 6 یا اس کے بعد کے ورژنز پر چل رہی ہوں گی۔

ماہرین کے مطابق واٹس ایپ مسلسل اپنے یوزر انٹرفیس، پرائیویسی سیٹنگز اور سکیورٹی فیچرز کو بہتر بنا رہا ہے، جس کے لیے جدید آپریٹنگ سسٹمز کی ضرورت ہوتی ہے۔ اسی وجہ سے کمپنی وقتاً فوقتاً پرانے سسٹمز کے لیے سپورٹ ختم کرتی رہتی ہے۔

میٹا اس وقت مصنوعی ذہانت (AI) پر مبنی نئے فیچرز بھی متعارف کرا رہا ہے، جن کے لیے زیادہ جدید ہارڈ ویئر اور نئے سافٹ ویئر کی ضرورت ہوتی ہے، جبکہ پرانے فونز ان فیچرز کو سپورٹ نہیں کر پاتے۔

صارفین کو مشورہ دیا گیا ہے کہ اگر وہ اب بھی پرانا اینڈرائیڈ فون استعمال کر رہے ہیں تو جلد از جلد اپنا واٹس ایپ ڈیٹا کسی نئی ڈیوائس میں منتقل کر لیں، کیونکہ مقررہ تاریخ کے بعد چیٹ ہسٹری، تصاویر، ویڈیوز اور دیگر میڈیا تک رسائی ختم ہو سکتی ہے۔

کمپنی کے مطابق اس اقدام کا مقصد صارفین کی سکیورٹی، پرائیویسی اور ایپ کی مجموعی کارکردگی کو بہتر بنانا ہے تاکہ واٹس ایپ جدید تقاضوں کے مطابق بہتر انداز میں کام کر سکے۔