 |
| فوٹو: فائل |
اسلام آباد: وفاقی دارالحکومت میں ممکنہ سکیورٹی اقدامات کے پیش نظر موٹروے پولیس نے اہم شاہراہوں پر ٹریفک کے حوالے سے نئی پابندیوں کا اعلان کردیا ہے۔
ترجمان موٹروے پولیس کے مطابق بدھ 23 ستمبر سے موٹروے M-1 پر اسلام آباد سے چھچھ انٹرچینج تک ہر قسم کی ٹریفک معطل رہے گی، جبکہ M-14 کو ہکلہ سے کنڈل تک بند کیا جائے گا۔
اسی طرح 23 ستمبر سے M-2 پر لاہور سے اسلام آباد کی جانب بڑی اور کارگو گاڑیوں کے داخلے پر پابندی ہوگی۔ اسلام آباد جانے والی بھاری ٹریفک کو متبادل طور پر جی ٹی روڈ استعمال کرنے کی ہدایت کی گئی ہے۔
موٹروے پولیس کے مطابق M-2 اور M-3 پر موجود ٹریفک کو کالاشاہ کاکو کے مقام سے جی ٹی روڈ کی طرف منتقل کیا جائے گا تاکہ اسلام آباد جانے والی ٹریفک کے لیے متبادل راستہ دستیاب رہے۔
دوسری جانب جی ٹی روڈ (N-5) بھی بدھ کی شام سے اٹک خورد کے مقام پر ٹریفک کے لیے بند کردی جائے گی۔
موٹروے پولیس نے شہریوں اور ڈرائیورز کو ہدایت کی ہے کہ سفر سے قبل ٹریفک کی صورتحال کو مدنظر رکھیں اور پابندی کے دوران متبادل راستوں کے حوالے سے جاری کردہ ہدایات پر عمل کریں۔
تحریر کے بارے میں اپنی رائے بھیجیں