لاہور(پ ر ) :لاہور آرٹس کونسل الحمراء میں کلاسیکل موسیقی کے پروگرام ”لاگے تُو سے نین“ کا انعقادکیا گیا۔پروگرام دیکھنے والوں سے الحمراء ہال نمبر دو پورا بھرا ہوا تھا، کلاسیکل موسیقی سننے والوں کو یہ پروگرام تادیر یاد رہے گا۔ نامور کلاسیکل گلوکار اُستاد شفقت علی خان نے راگ،ٹھمری اور کافی کی گائیکی پیش کی۔
اُستاد شفقت علی خان نے محفل موسیقی میں راگ دربادی پیش کیا تو لوگوں نے دل کھول کر داد دی۔خواجہ غلام فرید کی کافی ”سانول موڑ مہاراں“ نے محفل کو چار چاند لگادیئے۔شفقت علی خان نے بابا بلھے شاہ کا کلام ”آؤ سیورل دیونی ودھائی“ پیش کر کے پروگرام کا لطف دوبالا کیا۔ایگزیکٹوڈائریکٹر الحمراء ذوالفقار علی زلفی نے اس موقع پر کہا کہ الحمراء کا کلاسیکل موسیقی کو نئی نسل میں منتقل کرنے میں نمایاں اور منفرد مقام ہے،کلاسیکل موسیقی کو ہماری تہذیب و تمدن میں بے حد قدر کی نگاہ سے دیکھتا جاتا ہے۔ایگزیکٹوڈائریکٹر الحمراء ذوالفقار علی زلفی مزید کہا کہ کلاسیکل موسیقی میں ہمارے ہاں کام کرنے والوں کو سلام پیش کرتے ہیں،اس شعبے میں ایسے نام پیدا ہوئے جنہوں نے ملک وقوم کا نام روشن کیا۔ پروگرام”لاگے تُوسے نین“ میں عوام کی بڑی تعداد نے شرکت کی اور الحمراء کی کاوش کوبھرپور پذیرائی بخشی۔
٭٭٭٭٭٭٭
تحریر کے بارے میں اپنی رائے بھیجیں