دبئی سےاسرائیل جانے والی پرواز میں پائلٹس کے درمیان جھگڑا، طیارہ سعودی عرب میں اتر گیا

فوٹو: فائل

دبئی سے تل ابیب جانے والی فلائ دبئی کی پرواز FZ1073 میں دورانِ پرواز ہنگامی صورتحال پیدا ہوگئی، جس کے بعد طیارے کا رخ سعودی عرب کی جانب موڑ دیا گیا اور اسے تبوک ایئرپورٹ پر بحفاظت اتار لیا گیا۔

رپورٹس کے مطابق پرواز نے پہلے ہنگامی کوڈ 7700 اور کچھ دیر بعد 7500 سگنل بھی جاری کیا، جو ممکنہ غیر قانونی مداخلت یا ہائی جیکنگ کی صورت میں استعمال ہوتا ہے۔ اس صورتحال کے بعد سیکیورٹی حکام میں تشویش پیدا ہوئی۔

بعد ازاں اسرائیلی حکام نے واضح کیا کہ واقعے کو ہائی جیکنگ قرار نہیں دیا گیا۔ ایک اسرائیلی عہدیدار کے مطابق ابتدائی معلومات میں کاک پٹ کے اندر دونوں پائلٹس کے درمیان جسمانی جھگڑے کی بات سامنے آئی ہے، تاہم واقعے کی مکمل وجوہات جاننے کے لیے تحقیقات جاری ہیں۔

فلائ دبئی نے بھی تصدیق کی کہ پرواز میں ایک واقعہ پیش آیا اور طیارے نے تبوک میں محفوظ لینڈنگ کی۔ کمپنی کے مطابق تمام مسافر اور عملہ محفوظ ہیں اور متعلقہ حکام کے ساتھ مل کر واقعے کی تحقیقات کی جا رہی ہیں۔

رپورٹس کے مطابق طیارے میں تقریباً 150 مسافر سوار تھے۔ پرواز کے اچانک رخ بدلنے اور ہنگامی سگنلز کے باعث کچھ دیر کے لیے صورتحال انتہائی تشویشناک ہوگئی، تاہم طیارہ بحفاظت سعودی عرب میں اتر گیا۔